Klukkan rétt rúmlega 15:00 síðastliðinn föstudag lagði fyrsti bíll með kerru af stað frá Vík til Árbæjarhjáleigu. Bíllinn var drekkhlaðinn af spenntum krökkum, reiðtygjum og kosti fyrir komandi helgi en á kerrunni stóðu sex gæðingar klárir í hressandi helgi í nýju umhverfi.

Í Árbæjarhjáleigu tók Hekla Katarína á móti nemendum, síbrosandi að vanda og hófst strax handa við að miðla til fyrsta hóps af 6 það kvöldið. Alls voru 16 krakkar í æfingabúðum og þar af leiðandi 16 gæðingar krakkanna meðferðis, til útgerðarinnar þurfti þrjá bíla með kerrur og einn fólksflutningabíl. Þetta fyrsta kvöld æfingabúðanna var kennsla til klukkan 20:00 en þá komu allir sér fyrir í sumarbústaðnum "Hellinum" sem við höfum undanfarin ár haft afnot af og gæddu sér svo á grilluðum hamborgurum og frönskum. Eftir matinn voru brettar upp ermar og skunduðu krakkarnir á milli húsa á Hellu og seldu saltfisk til fjáröflunar æfingabúðanna, það voru því nokkuð lúin börn sem skriðu í bælið á föstudagskvöldi.

 Á laugardagsmorgni var strax byrjað að kenna klukkan 9:00 en eldri deildin byrjaði í hollum svo yngri deildin hafði ofan af fyrir sér í leikjum og skellti sér svo í sund á Hvolsvelli, eftir hádegi var auðvitað áframhaldandi kennsla en þá var yngri deildinni kennt í hollum og eldri deildin var svo heppin að komast á spennandi bingó í Rangárhöllinni.

Kennsla var til klukkan 17:00 á laugardag en þá var hafist handa við að æfa sýningaratriði sem eldri deildin mun sýna á Æskan og hesturinn næstu helgi, eftir æfingu og umstang um hrossin var haldið beint út að borða á Árhúsum þar sem gómsætar pizzur runnu vel í þreyttan en sælan mannskapinn. Eftir matinn tók svo við "cosy stund" í bústaðnum.

  Sunnudagurinn byrjaði einnig snemma og gekk kennslan verulega vel fyrir sig að vanda, það voru því alsælir krakkar sem kvöddu Heklu um klukkan 18:00 og brunuðu heim á leið með þrautæfða gæðingana í eftirdragi.

  Við þökkum öllum þátttakendum kærlega fyrir helgina, sendum Heklu Katarínu kærar þakkir fyrir móttökuna og kennsluna og ekki síður foreldrum sem bökuðu bakkelsi fyrir kaffitímana og útveguðu m.a. hádegismat í eitt mál. Auk þess styrkti Víkurskáli krakkana í formi morgunverðar og tveggja máltíða en allt þetta gerir okkur kleift að halda þátttökugjöldum í lágmarki svo allir geta verið með. Við erum strax farin að hlakka til næsta árs enda er þetta alveg orðinn fastur liður í starfi æskulýðsnefndarinnar og skilar sér í verulega auknum áhuga krakkanna og svo ekki sé talað um aukna kunnáttu þeirra.

Með kveðju

Komið þið sæl,

Við höfum verið að hanna geymsluskáp fyrir hnakka og beisli sem er læstur og nokkuð öruggur, með þriggja punkta læsingu.

Allur úr ryðfríu stáli AIS 316 boltaður saman og auðveldur í uppsetningu.
 
Langar að bjóða ykkar fólki að kaupa skápinn á kynningarafslætti, get látið ykkur hafa 10% afslátt.

Ekkert mál er að koma og halda kynningu á þessu ef vilji er fyrir hendi.
Kv Einar Gíslason

Fyrirhugað er að halda keppni í þolreið á Kríunni í Flóanum í vor.
Þrátt fyrir að nokkrum sinnum hafi verið haldnar keppnir í þolreið hefur þessi skemmtilega keppnisgrein ekki náð að festa rætur hér á landi.
Nú hefur hópur áhugamanna ákveðið standa fyrir keppnum í þolreið og er fyrsta mótið fyrirhugað í byrjun maí í vor. Keppnisgreinin hentar öllum, og sem flestir hvattir til að taka þátt. 
Þolreið er kannski villandi hugtak því greinin byggist frekar á því að þekkja sinn hest, hafa hann vel undirbúinn og geta riðið honum ákveðna vegalengd á sem bestum tíma en þó þannig að áreynsla á hestinn verði sem minnst. 

Opinn kynningar- og hugmyndafundur verður haldinn föstudaginn 14. mars næstkomandi kl. 20.00 á Kríunni, sem er staðsett 4 km utan við Selfoss.
Á fundinum verða kynntar hugmyndir þeirra sem eru að skipuleggja viðburðinn og óskað eftir tillögum og hugmyndum frá þeim sem áhuga hafa á að taka þátt eða koma að verkefninu með einhverjum hætti.

Einar Öder mætir á fundinn og kynnir hugmyndina á bakvið keppni í þolreið ásamt Sveini Ólasyni dýralækni en keppnin fer fram undir eftirliti og í samvinnu við Dýralæknaþjónustu Suðurlands.

Pollapepp Sindra fór fram mánudaginn 2.mars.

Við útbjuggum okkur hesta með sög, spýtum og böndum og nefndum þá
eftir því sem að okkur hentaði.

Síðan skelltum við okkur í útreiðartúr.
Þeir voru frekar viljugir af stað og hrekktu sumir en fóru svo á öllum gangi.
Aðeins kíktum við "inní afrétt" að gá til kinda,
gáfum þeim að éta og drekka og riðum svo heim á leið.

Heldur voru þeir viljugri á heimleiðinni en ekki datt nema einn af baki.
Eftir góðan útreiðartúr fengum við okkur rjómabollur í tilefni dagsins.

Takk fyrir samveruna!

Annað vetrarmót hmf. Sindra var haldið á Péturseyjarvelli í gær. Þátttaka var ágæt og veðrið lék við keppendur og áhorfendur . Dómarar vetrarmótsins voru Kristín Lárusdóttir og Guðbrandur Magnússon og er Víkurskáli styrktaraðili vetramótanna þriggja sem telja til stigakeppni. Úrslit urðu eftirfarandi: